跑步？咩黎嫁？跑步可以搵到幾多錢？唔好再搵我跑步啦⋯

結完婚用盡我一生嘅積蓄，銀行戶口得返幾千蚊，婚後同父母同住，但我連每月供養父母嘅錢都唔夠，望住幾十尺嘅房，兩尺半嘅床，我只能更努力搵錢，俾屋企人過好少少嘅生活。

當時，我連供養父母嘅錢都唔夠。為左報答父母收留，幫呀爸做搬搬抬抬嘅工作，免得佢老人家整親。午飯時慣左同呀爸落茶餐廳食，無論天氣幾熱我都淨係飲熱奶茶，因為凍飲要加兩蚊，就係為左慳果兩蚊。慢慢就慣左果種味道。

跟住仲有一次電單車交通意外，整親條腰，醫生診斷係椎間盤突出。一做粗重野條腰就痛，影響到我做唔到野。其實我從來都唔係貪心，我只係想滿足基本嘅生活需求，但無論我點努力，都只係徒勞無功。

聽到身邊嘅人炒股票黎賺錢，我學學下仲賺到啲快錢，但一次投資失誤又輸返晒。果陣好興一句說話「年輕不怕後悔」輸晒所有嘢，就重新來過。

果次之後，我明白到做人要腳踏實地，努力拼搏，肯捱唔怕辛苦，賺到嘅財富先真正屬於自己。如果無付出努力之下搵返黎嘅財富，唔會珍惜，亦都無意義。

灰暗嘅日子，始終都會過去，我儲到少少錢，搬左出黎住，亦已經適應消防員嘅生活，仲開始儲到個肚腩仔。昔日嘅光輝，已經完全褪色。跑步？咩黎嫁？我而家咁樣仲跑到咩？

直至有一日，部門出左個email招募體能教練(PTI)，我有興趣試，但已經唔想重新適應。我嘅第三個啟蒙老師，對我有好大啟發。

————————————

現時視角：

每次辛勞過後，我都會嘆一杯熱奶茶，佢除咗岩我口味，仲有我背後嘅故事。

從生活嘅掙扎我領悟到做人要腳踏實地，一分耕耘 一分收穫，呢個道理同跑步係一模一樣。

每人嘅背景都唔同，我係克服左現實限制之後，先開始追夢想嘅人。亦都因為咁，我搵到生活中嘅平衡點，等認清方向之後，可以行得更持續更遠。